يااه بقالي فتره كبيره مكتبتش حاجه في البلوج.. الدنيا بتسرق اوي .. النهارده هتبقى اول حلقه في الاسبوعيات بتاعتي.. تجربه بمر بيها وهي تجربة التدريب في محطة توليد كهرباء حراريه خاصه ..ومتهيألي انها هتبقى مسليه انها تتحكي للناس ..
محطة الكهرباء اللي بتدرب فيها
انا خلصت ثانيه قوى في الكليه ..ورايح ثالثه قوى كهربيه..واخترت التدريب الصيفي السنه دي في محطة كهرباء شرق بورسعيد ودي محطه خاصه تعمل عمل بنظام البوت ..وده نظام من افتكاسات الحكومه المبجله..تحت رعاية بابا حسني ووزير الكهرباء والطاقه الاسبق ماهر اباظه..
يعني ايه نظام البوت؟ BOOT
نظام البوت ده بكل بساطه كالتالي...تيجي شركه اجنبيه (اي دي اف الفرنسيه في حالتنا) وتبني محطة توليد كهرباء في مصر ..وتبيع الكهرباء لوزارة الكهرباء والطاقه واللي بدورها بتاخد الكهرباء المباعه وتبيعها للمستهلك..وفي مقابل السماح للشركه الفرنسيه للعمل في مصر ..الشركه ملزمه انها تسيب المحطه اللي هي بنتها وتسلمها لوزارة الكهرباء والطاقه في مصر بعد 20 سنه بالتمام والكمال..
وايه اللي مش كويس هنا؟! تعالوا نقول شوية معلومات مبسطه اوي .. اول حاجه تكلفة انتاج كيلو وات الكهرباء 9 قروش..وبيبتاع للمستهلك العادي ب4 قروش ..ده بسبب الدعم ..يعني من الاخر الحكومه بتخسر في بيع الكهرباء بسبب الدعم..طيب والشركه الفرنسيه هتخسر وتبيع الكيلوات ب4 قروش برضه؟! لا طبعا ..الشركه الفرنسيه بتبيع بسعر اغلى للحكومه(2 سينت امريكي للكيلو وات = حوالي 14 قرش مصري)..يعني الحكومه بتخسر مرتين ..في الشراء والبيع..الحكومه صعب عليها ان الفلوس تتنهب للمصريين بس فقررت تدخل الاجانب كمان.. مفيش داعي اقولكم ان مع كل طلعة شمس على الاقل مصر بتخسر 3 مليون دولار بسبب نظام البوت . وطبعا الحجه اللي اتعمل بيها المشروع ده لتوفير الطاقه للتعمير وبناء المصانع ..وطبعا الكباري..
المهم .. اليوم بتاعي بقى يوم زي بتاع الموظفين تماما ...الساعه 4 الفجر اصحى على تليفون عشان متروحش عليا نومه..استحمى وافطر واقعد نت شويه لو فيه وقت ..وانزل اركب الاتوبيس اللي ميعاده 6 وثلث الفجر..وبعد كده بروح المحطه واخلص شغل الساعه 5 واركب اتوبيس ..الساعه 5 وربع..وبكون في البيت حوالي الساعه 7 مساءا
كعادة الاجانب المحطه منظمه جدا جدا جدا..مفيش اي عماله زياده ..نظيفه بطريقه لا تصدق..رغم ان مفيش اجانب في المحطه غير اتنين ..مسيو جون لوك بواييه المدير الفرنسي للمحطه و مستر انبارناس مدير الصيانه الماليزي.. بس تحس بالنظام في كل ركن.. المحطه حاصله على شهادة ايزو 14001 ودي خاصه بالنظافه والبيئه والامان..وبصراحه تستحقها ..
انا المتدرب الوحيد في المحطه (يقال ان في بنت هتدرب سكرتاريه بس لسه مشفتهاش) وبالتالي مفيش برنامج تدريب محدد ليا ..بس انا مستقر حاليا مع قسم الصيانه الكهربيه ..وشغلهم للاسف في المحطه مش قوي ..لان كعادة الاجانب المؤمنين بعنف بمنهج التخصص ..يعني لو حاجه باظت ..مش بيلجأوا لقسم الصيانه ..ولكن بيستدعوا شركه متخصصه في الصيانه ..يعني اقسام الصيانه هنا مجرد صيانه وقائيه..
القسم ده بيتكون من 6 افراد (3 مهندسين و 3 فنيين) والمشرف عليهم..ولحسن الحظ الناس كلها كويسه وخدومه جدا..
في اول يوم عرفت اني مش رايح اقعد هناك..اشتغلت في اول يوم واشتغلت بايدي ووقفت حوالي 3 ساعات في الشمس ..وطبعا لازم عشان الامان ابقى لابس اوفرول بتاع المحطه و خوذة حمايه وجذمة حمايه ودول للي مش متعود عليهم بيضايقوا جدا جدا..المهم اليوم عدى ..تاني يوم كان جوله حوالين المحطه وشرح تام بالتفصيل لكل مسمار فيها ..
تالت يوم دخلت كورس السيميولاتور.. simulator الكورس ده محاكاه تامه لادارة المحطه من غرفة التحكم الرئيسيه ..وده المفروض بياخدوه المهندسين العاملين في المحطه ..وانا اساسا لسه مدخلتش تالته هندسه ..يعني حوالي 40 % منه مفهمتوش..بس كان مسلي واستمر لمدة يومين.. كنت مزوغ شويه من السيميولاتور في اول يوم ..ولقيت قدامي الترسه !! ودي صورها..
على الميزان صوره قريبه لراسها صوره وعامل في المحطه شايلها ..شايفين حجمها؟
المفروض ان الترسه حيوان مهدد بالانقراض...بس عشان المحطه على البحر كعادة محطات توليد الطاقه البخاريه..فكتير بنلاقيها على الشاطيء..وكتير بتعلق في الشبك (وقبل كده اتعلق قرش في الشبك بتاع مدخل المياه بتاع المحطه (الصوره على الشمال)
المهم اللي بيحصل ان الناس بتوزن الترسه وتصورها وبعدين ترجعها للبحر وتقدم تقرير بيدل على ان المحطه بتساهم في الحفاظ على البيئه .. كانت شكلها ظريف بس صراخها وحش اوي..
وده كان ملخص بسيط لاول اسبوع ..ممكن ابقى ارجع لو افتكرت حاجه تانيه اكتبها .. واسيبكم مع شوية صور للمحطه...
جزء من المحطه متصور من فوق المدخنه
الساحل من فوق المدخنه ..في الصوره ايهاب(انت على التلافازيون يا هوبا :) وهو فني في قسم الصيانه الكهربيه..صور المحطه طبعا قديمه مش انا اللي مصورها..لكن صور الترسه انا اللي مصورها..
